നൈരന്തര്യബോധമാര്‍ന്ന കഥനകലയിലൂടെ മലയാളിയുടെ ഭാവുകത്വപരിണാമത്തിന് പുതിയ ദിശ നല്കിയ സി.വി. ബാലകൃഷ്ണന്റെ തിരഞ്ഞെടുത്ത നൂറ്റമ്പതു രചനകളുടെ സവിശേഷസമാഹാരം. മതം, കല, അധികാരം, രാഷ്ട്രീയം, നീതി, കാമം, കുടുംബജീവിതം, സുഹൃദ്ബന്ധം എന്നിങ്ങനെ ജീവിതമെന്ന പെരുവഴിയിലെ എല്ലാ സ്ഥാനങ്ങളും ഈ കഥകളിലുണ്ട്. നമ്മില്‍നിന്ന് തെന്നിമാറിക്കൊണ്ടിരിക്കുന്ന അന്തിമയാഥാര്‍ഥ്യത്തെ പ്രസന്നമായ ആഖ്യാനത്തിലൂടെ നിര്‍വചിക്കാന്‍ ഇവ ശ്രമിക്കുന്നു. പ്രമേയസ്വീകരണത്തിന്റെ വൈവിധ്യം, ഭാഷയുടെ സൂക്ഷ്മചാരുത, നവീനമായ ആഖ്യാനരീതി, മനുഷ്യപ്രകൃതിയോടും ഭൂപ്രകൃതിയോടും ജീവജാലങ്ങളോടും കാട്ടുന്ന സ്‌നേഹവാത്സല്യങ്ങള്‍ എന്നിവയൊക്കെച്ചേര്‍ന്ന് നമ്മുടെ കാലത്തെ വലിയ കഥാകൃത്താണ് സി.വി. ബാലകൃഷ്ണന്‍ എന്ന് ഓര്‍മിപ്പിക്കുകയും സാക്ഷ്യപ്പെടുത്തുകയും ചെയ്യുന്ന കൃതി.